新聞稿

英皇擲五千萬中環開戲院

2016-09-26

【on.cc東網專訊】 英皇電影近日睇中中環娛樂行地點優越,與業主達成合作協議租用,預算投資約5,000萬港元打造旗下第一間戲院,初定明年正式投入服務。

繼續物色新地方

談到首次投資開設戲院,英皇電影行政總裁利雅博表示﹕「我哋暫定會開設3、4間house,提供約400個坐位,以咁嘅投資相信戲院所有設備都會係優勢嘅,(戲院)會走高檔路線,戲票價格稍後先會有定案。而楊生對影業前景抱有信心,佢叫我哋放膽繼續去物色中環以外其他合適嘅地點,唔排除好快就會有第2間(戲院)嘅出現。」他又指開戲院屬長線投資,相信回本期可能要長達5、6年。

搵姜文馮小剛執導

利雅博坦言與1990年代比較,香港戲院數目下降足足6成,市場上出現嚴重「underscreen」(缺大銀幕)的情況,英皇睇準「時機」,決定於院線方面大展拳腳:「喺香港今次算係第1擊,但英皇其實喺內地不同省市包括上海等地已開設多間戲院,呢方面嘅工作亦都會繼續,一定唔會放慢腳步。」他又指英皇電影會維持每年起碼6-8部電影制作,以配合旗下戲院數量持續增加的需要,至於2017年更已成功羅致內地名導演姜文及馮小剛效力:「馮小剛新戲會喺下半年先開拍,而姜文就鐵定春節過後就會開拍改編自武俠小說嘅電影《俠隱》,而今年年底,我哋會先改編開拍東野圭吾小說《解憂雜貨店》。」

祖兒想拍電影

英皇旗下藝人任達華、容祖兒及Twins等對公司開設戲院大感雀躍。任達華笑謂﹕「我出年都會再執導演筒,梗係希望有機會嘅話,老闆(楊受成)肯投資啦,其實可唔可以受埋我入股(開戲院)呀?」祖兒透過經理人回覆表示:「當然支持啦,咁樣影業會更見蓬勃,我都想喺電影方面有更多嘅發展。」Twins則謂:「楊先生好犀利喎,希望可以快啲喺銅鑼灣同尖沙咀開戲院,我哋行街去到邊睇(戲)到邊,咁就very good嘞。」

同為英皇電影旗下藝人的惠英紅及溫碧霞絕對支持公司開設戲院。身在西安出席影展的惠英紅表示:「聽到都開心,英皇有自己嘅戲院,作為旗下藝人梗係覺得驕傲,日後自己嘅戲可以喺自己公司戲院上,你話有幾威呢,希望可以愈開愈多(戲院)啦。」溫碧霞則謂:「非常開心同支持英皇院線大展鴻圖,希望給與更多電影工作者,或是愛好欣賞電影的觀眾有更多觀賞好電影的機會。」

09月24日(六) 23:08

< 返回